Tetë ndeshjet e para të Kupës së Botës 2026 kanë pasur një të përbashkët: asnjëra nuk ka filluar në orarin e planifikuar.
Sipas të dhënave të deritanishme, çdo takim i zhvilluar në ditët e para të turneut është shtyrë, me një vonesë mesatare prej rreth tre minutash për ndeshje.
Vonesa më e madhe u shënua në ndeshjen hapëse mes Meksikës dhe Afrikës së Jugut, e cila nisi gjashtë minuta pas orarit zyrtar.
Nga ana tjetër, sfida mes Katarit dhe Zvicrës u shty me afro pesë minuta. Vetëm përballjet Koreja e Jugut – Çekia dhe Australia – Turqia filluan me më pak se një minutë vonesë.
Ceremonitë para takimeve po sjellin shtyrjet
Megjithëse vonesa prej një apo dy minutash mund të duket e vogël, ajo përbën shqetësim për FIFA-n, e cila zakonisht e organizon çdo element me saktësi të lartë.
Për secilën ndeshje ekziston një protokoll i hollësishëm që përcakton kohën kur ekipet dhe gjyqtarët duhet të mblidhen në tunel, momentin e daljes në fushë dhe nisjen e himneve kombëtare. Këto afate kanë rëndësi të veçantë edhe për transmetuesit televizivë, të cilët e planifikojnë programin dhe reklamat sipas minutazhit të përcaktuar.
Në disa raste, skuadrat nuk kanë qenë gati në kohën e parashikuar për të hyrë në fushë, duke krijuar një efekt zinxhir që ka shtyrë nisjen e ndeshjeve.
FIFA mund të mos ketë llogaritur saktë kohën e nevojshme
Një nga shkaqet kryesore të këtyre vonesave duket të jetë formati i ri ceremonial që FIFA ka vendosur përpara nisjes së ndeshjeve. Tashmë, gjatë himneve kombëtare, në qendër të fushës vendoset e gjithë skuadra dhe jo vetëm formacioni titullar, ndërsa në të dy krahët e fushës shpalosen flamuj gjigantë.
Sipas FIFA-s, ky format synon të krijojë “një moment uniteti, krenarie dhe emocionesh”, por njëkohësisht ka rritur edhe kompleksitetin organizativ para fillimit të takimeve.
Organizatorët shpresojnë që ky proces të bëhet më i rrjedhshëm në ditët në vijim, teksa ekipet, gjyqtarët dhe stafet organizative përshtaten me rutinën e re. Gjithsesi, mbetet e mundur që FIFA ta ketë nënvlerësuar kohën e nevojshme për zhvillimin e ceremonive para ndeshjeve.
Pavarësisht këtyre vonesave, turneu ka nisur me interes të madh nga tifozët, ndërsa mbetet të shihet nëse ndeshjet e ardhshme do të luhen sipas orarit apo nëse ky trend do të vazhdojë edhe gjatë javëve në vazhdim.
