Milani është shfaqur si një pretendent serioz për Virgil van Dijkun, ndërsa Liverpooli po përgatitet për mundësinë që mbrojtësi holandez të largohet nga Anfield.
Në nëntë vitet e tij në Merseyside, Van Dijk është renditur mes mbrojtësve më të mirë në botë. Me të në skuadër, “Të Kuqtë” kanë fituar të gjithë trofetë e mundshëm, mes tyre Ligën e Kampionëve, dy tituj të Ligës Premier, dy Kupa Carabao dhe një FA Cup.
Kontrata e 35-vjeçarit përfundon në qershor 2027, çka lë të hapur mundësinë e largimit të tij si lojtar i lirë verën e ardhshme. Sipas MilanNews24, Milani e ka vendosur në krye të listës së objektivave për mbrojtjen dhe pronari Gerry Cardinale po drejton përpjekjet për ta transferuar.
Luka Vuskovic
Të përsërisësh ndikimin që Van Dijk ka pasur te Liverpooli për gati një dekadë do të ishte jashtëzakonisht e vështirë. Megjithatë, Luka Vuskovic i Brightonit shihet si një lojtar me potencial për të ndjekur rrugën e tij.
Brightoni e mori 19-vjeçarin nga Tottenhami për 50 milionë euro këtë verë. Ai tashmë ka spikatur si një prej talenteve më premtuese në elitën angleze, ndërsa Liverpooli raportohet të jetë mes klubeve me interes serioz për të. Kontrata e Vuskovicit në ‘AMEX Stadium’ zgjat deri në vitin 2031.
Tarik Muharemovic
Tarik Muharemovic, njësoj si Vuskovic, po luan sezonin e parë në Ligën Premier. Ai iu bashkua Leeds Unitedit nga Sassuolo për 34.1 milionë euro, por paraqitjet e tij japin përshtypjen e një lojtari me përvojë prej një dekade në elitën angleze.
Mbrojtësi boshnjak, 1.93 metra i gjatë, është bërë pjesë e rëndësishme e skuadrës së Daniel Farkes. Leedsi ndodhet në vendin e 12-të me 11 pikë pas nëntë ndeshjesh, ndërsa Muharemovic ka treguar forcë fizike, siguri në duelet ajrore dhe aftësi në lojën me topin.
Për të mbushur vendin e Van Dijkut, Liverpoolit do t’i duhej një mbrojtës që të imponojë fizikisht dhe të jetë cilësor në posedim. Muharemovic i përmbush të dyja këto kërkesa, ndaj përbën një kandidat të përshtatshëm.
Jarell Quansah
Shitja e Jarell Quansah te Bayer Leverkuseni për 35 milionë euro, në korrik 2025, la përshtypjen se Liverpooli mund ta kishte larguar shumë herët reprezentuesin e Anglisë.
Që atëherë, Quansah është afirmuar si një nga qendërmbrojtësit e rinj më premtues në Evropë për lojën me topin. “Të Kuqtë” kanë një klauzolë riblerjeje prej 70 milionë eurosh, të vlefshme për aktivizim deri më 15 qershor 2027.
Kjo i jep Liverpoolit mundësinë që verën e ardhshme ta rikthejë në klub lojtarin e dalë nga akademia e vet.
Nico Schlotterbeck
Në Bundesligë, Quansah nuk është i vetmi emër që mund të hyjë në planet e Liverpoolit për një mbrojtës të nivelit të lartë. Edhe Nico Schlotterbeck është shfaqur si kandidat për të pasuar Van Dijkun.
Sipas Caught Offside, lojtari i Borussia Dortmundit është ndër objektivat kryesorë të klubit. Reprezentuesi gjerman zotëron disa prej cilësive që Liverpooli kërkon të shtojë në mbrojtje.
Schlotterbeck është këmbëmajtë, luan me agresivitet dhe parapëlqen të dalë përpara. Ai është i fortë në ajër dhe në nisjen e aksioneve nga prapavija. I vlerësuar si një nga qendërmbrojtësit më të mirë në botë, ai do të përshtatej menjëherë në anën e majtë të qendrës së mbrojtjes.
