Anglia ka marrë një goditje të madhe pak para nisjes së Kupës së Botës, pasi mbrojtësi Tino Livramento është detyruar të tërhiqet nga turneu për shkak të një dëmtimi në pulpën e këmbës.
Mbrojtësi i Newcastle United nuk do të jetë pjesë e Botërorit dhe në skuadrën e Thomas Tuchel do të zëvendësohet vetëm një ditë përpara ndeshjes hapëse të Anglisë ndaj Kroacisë.
Livramento, që është i aftë të luajë në të dy krahët e mbrojtjes, shihej si një alternativë e rëndësishme për trajnerin gjerman dhe ishte kandidat për të bërë paraqitjen e tij të parë në një turne të madh ndërkombëtar.
23-vjeçari vjen pas një sezoni të vështirë, të shoqëruar nga probleme të shumta fizike. Gjatë sezonit 2025/26, ai bëri vetëm 17 paraqitje në Ligën Premier për shkak të disa lëndimeve të njëpasnjëshme.
Gjatë vitit të kaluar, ai pësoi dy dëmtime në gju që e mbajtën larg fushave për dy muaj, ndërsa në janar një problem në muskujt e pasmë të kofshës e detyroi të mungonte në 15 ndeshje. Më pas, një dëmtim në kofshë në muajin prill i mbylli para kohe sezonin me Newcastle.
Pas konfirmimit të dëmtimit më të fundit, Livramento do të kthehet te klubi i tij për të filluar rehabilitimin.
Sipas rregullave të FIFA-s, Anglia ka të drejtë ta zëvendësojë lojtarin me një futbollist nga lista paraprake me deri në 55 emra, e cila ishte dorëzuar përpara se grupi përfundimtar të ngushtohej në 26 lojtarë.
Federata angleze duhet ta kryejë këtë zëvendësim brenda afatit të vendosur nga FIFA, i cili përfundon 24 orë para ndeshjes së parë në Botëror.
