Për transfertën rumune kundër Universitatea Craiova, Nevil Dede do të ketë në dispozicion një grup të reduktuar në 20 lojtarë. Egnatia do ta zhvillojë nesër, në orën 21:00, takimin e saj të tretë në Conference League.
Mungesës së konfirmuar të Eljon Sotës, i cili ndodhet në Barcelonë për t’iu nënshtruar një ndërhyrjeje kirurgjikale, i shtohet edhe ajo e Ildi Grudës. Sulmuesi nuk është rikuperuar në kohë nga dëmtimi i pësuar në përballjen me Tiranën, duke ia vështirësuar Dedes përzgjedhjet për repartin e avancuar.
Gruda ka spikatur në arenën evropiane dhe pamundësia për ta aktivizuar i ndryshon planet trajnerit. Për sulmin, Dede mund të shqyrtojë alternativat Adjessa, Albanese, Hoxha dhe Loukili.
Nga mbrojtja, ndërkohë, vjen lajmi i rikuperimit të Eneo Bitrit, i cili është i gatshëm për t’u vënë në shërbim të trajnerit në qendër të repartit. Për të zëvendësuar Eljon Sotën, Dede do të mbështetet te Ledjo Beqja.
