Eksperti i arbitrimit Alfonso Burrull ka dalë kritik ndaj vendimit të gjyqtarit François Letexier, i cili anuloi golin e dytë të Egjiptit në përballjen me Argjentinën në Kupën e Botës.
Në atë moment, Egjipti dukej se kishte shkuar drejt dyfishimit të epërsisë ndaj kampionëve në fuqi, pasi Mostafa Ziko finalizoi bukur një aksion të shpejtë. Megjithatë, pas rishikimit me VAR, goli nuk u quajt i rregullt, me arsyetimin se në nisje të aksionit ishte shkaktuar faull ndaj mbrojtësit argjentinas Lisandro Martínez.
Ky vendim hapi debat të madh, ndërsa Burrull u shpreh se nuk arrin ta justifikojë ndërhyrjen e arbitrit në atë rast.
“Ky është një aksion që nuk ka ndikim të mjaftueshëm në gol. Në një lojë ku topi kalon gjithë fushën dhe pas disa sekondash vjen goli, të rikthehesh kaq shumë pas për një kontakt të tillë nuk më duket proporcionale”, deklaroi ai.
Ish-gjyqtari theksoi se kontakti ndaj Martínez nuk ishte aq evident sa të çonte në ndryshimin e vendimit përmes VAR-it.
“Nuk është një gabim i dukshëm, i qartë apo i rëndë. Nëse gjyqtari do ta kishte ndalur lojën në atë moment dhe do ta kishte dhënë faullin, do të ishte një vendim i pranueshëm, por pasi loja vazhdoi, nuk kishte arsye të kthehej pas për ta anuluar golin”, shtoi Burrull.
Përballja mes Argjentinës dhe Egjiptit pati shumë episode dramatike, mes tyre edhe një penallti të humbur nga Lionel Messi, si edhe polemika të forta për gjykimin. Në fund, Argjentina siguroi kualifikimin më tej falë fitores 3-2 ndaj Egjiptit.
