Që topat e futbollit të sillen sa më në mënyrë të parashikueshme, inxhinierët e sportit studiojnë me vëmendje qendrën e masës dhe ekuilibrin e tyre, në mënyrë që të sigurojnë performancë sa më të mirë në fushë.
Gjatë këtij viti, ekuipazhi i Stacionit Ndërkombëtar Hapësinor (ISS) përsëriti një eksperiment të kryer për herë të parë në vitin 2019, duke përdorur topin zyrtar të Kupës së Botës 2026, adidas Trionda.
Testi synonte të tregonte se si një balancë e mirë ose e dobët ndikon në lëvizjen dhe sjelljen e topit gjatë lojës.
Sipas NASA-s, gjetjet nga këto eksperimente kanë ndihmuar për të kuptuar më qartë se çfarë ndikimi mund të kenë në performancën e topave gjatë lojës teknologjitë e integruara në modelet moderne, përfshirë sensorët që përdoren në ndeshjet zyrtare.
Agjencia amerikane nënvizon se përmirësimi i pajisjeve sportive përbën vetëm një prej mënyrave se si kërkimet shkencore të zhvilluara në ISS japin kontribut në përparime që sjellin dobi edhe për jetën në Tokë.
Në pamjet e publikuara nga stacioni hapësinor, topi shumëngjyrësh i Kupës së Botës 2026 shfaqet duke notuar në modulin panoramik “Cupola”, ndërsa në sfond dallohet Toka përmes dritareve të mëdha.
Videoja paraqet gjithashtu astronautët teksa lëvizin në kushte mikrograviteti dhe e godasin lehtë topin, duke i dhënë futbollit një dimension tërësisht të ri: atë të hapësirës.
