Jude Bellingham ishte mes figurave kryesore në fitoren 4-2 të Anglisë kundër Kroacisë në ndeshjen e parë të Grupit L të Kupës së Botës 2026, duke e vulosur paraqitjen e tij me një gol në pjesën e dytë.
Para sfidës kishte dyshime dhe spekulime nëse mesfushori i Real Madridit do ta niste si titullar në ekipin e Thomas Tuchel, por 22-vjeçari dha përgjigjen më të mirë në fushë dhe, pas ndeshjes, tha se ishte i kënaqur që kishte lënë pas zhurmën që e kishte shoqëruar në ditët e fundit.
“Për mua personalisht ishte mirë të lija mënjanë pak zhurmë dhe t’i tregoja vendit tim, shokëve të skuadrës, sa i përkushtuar jam për të na ndihmuar të fitojmë ndeshje futbolli”, tha Bellingham.
Mesfushori anglez vlerësoi reagimin e skuadrës pas një pjese të parë jo shumë bindëse, duke nënvizuar se Anglia e rriti nivelin e lojës pas pushimit.
“Mendoj se ishte një paraqitje e shkëlqyer e ekipit në pjesën e dytë. Në pjesën e parë kishim intensitetin e duhur, por me topin nuk ishim ende aty ku duhej, ndërsa në pjesën e dytë besoj se e zhvilluam gjithçka si duhet”.
Bellingham shtoi se të përfaqësosh Anglinë mbetet një privilegj i jashtëzakonshëm për të, pavarësisht kritikave apo debateve që mund të vijnë nga jashtë.
“Sërish, të kontribuoj për të ndihmuar ekipin tim, për të ndihmuar vendin tim, është një nga nderet më të mëdha. Pavarësisht zhurmës jashtë, ky nder nuk ndryshon për mua”, u shpreh Bellingham.
