Elbasani ka bërë zyrtar prej pak minutash afrimin e portierit Igor Aleksovski, duke i dhënë kështu zgjidhje repartit të portës për sezonin e ri.
Me këtë lëvizje në merkato, verdheblutë kanë gjetur zëvendësuesin e ish-portierit Martin Janacek, ndërsa trajneri Ivan Gvozdenovic fiton më shumë qetësi sa i takon rolit të numrit “1”.
Në edicionin që sapo u mbyll, 31-vjeçari ishte titullar i padiskutueshëm te Flamurtari në Superiore. Aleksovski regjistron gjithashtu edhe 2 paraqitje me kombëtaren e Maqedonisë së Veriut.
Njohja që ai ka me Superioren pritet t’ia lehtësojë përshtatjen te Elbasani. Më herët, portieri në fjalë ka qenë pjesë edhe e bardhebluve të Shkupit në Maqedoninë e Veriut, ndërsa trofeun e vetëm në karrierë e ka fituar me Vardarin, kampionatin.
