Dukagjini e ka mësuar kundërshtarin për raundin e dytë kualifikues të Ligës së Konferencës, pas shortit të hedhur të mërkurën në Nyon të Zvicrës.
Fituesi i Kupës së Kosovës do të ndeshet me ekipin zviceran Lugano, një rival me përvojë të madhe në garat evropiane.
Lugano e mbylli sezonin 2025/26 në pozitën e tretë të Superligës së Zvicrës, duke siguruar pjesëmarrjen në garat kontinentale edhe për edicionin e ardhshëm.
Ekipi zviceran ka qenë rregullisht i pranishëm në skenën evropiane në vitet e fundit dhe llogaritet favorit në këtë duel, edhe pse Dukagjini do të mundohet të bëjë surprizën.
Një element interesant i kësaj përballjeje është prania e disa futbollistëve shqiptarë te Lugano. Portën e skuadrës zvicerane e ruan portieri i dytë i Kosovës, Amir Shaipi, ndërsa pjesë e ekipit janë gjithashtu Ezgjan Alioski dhe Uran Bislimi.
Ndeshjet e raundit të dytë kualifikues të Ligës së Konferencës do të luhen gjatë muajit korrik, ndërsa Dukagjini do të përpiqet të vazhdojë rrugëtimin evropian ndaj një prej kundërshtarëve më të fortë që mund t’i caktohej në short./
