Kombëtarja e Norvegjisë është futur në një situatë të papritur dhe tejet të ndërlikuar në prag të sfidës së ardhshme vendimtare, një takim me peshë historike për këtë brez që udhëhiqet nga Erling Haaland.
Sipas raportimeve të mediave vendase, brenda përfaqësueses është përhapur një virus i rëndë, që ka nxjerrë jashtë loje disa futbollistë të rëndësishëm, ndërsa stafi mjekësor po punon me urgjencë për të rikuperuar pjesën tjetër të skuadrës.
Te kampi norvegjez mbizotëron shqetësimi, pasi trajneri dhe ndihmësit e tij po përballen me një përhapje më të shpejtë nga sa ishte parashikuar të simptomave, mes të cilave përfshihen temperaturë e lartë dhe lodhje e përgjithshme.
Megjithëse identiteti i lojtarëve të prekur po mbahet ende i fshehtë, me qëllim që të mos i jepet asnjë avantazh kundërshtarit, është bërë e ditur se gjendja konsiderohet mjaft serioze.
“Kemi një gjendje të jashtëzakonshme në ekip. Po bëjmë gjithçka që është në fuqinë tonë, i kemi izoluar lojtarët e sëmurë, por situata nuk është aspak e këndshme para një ndeshjeje të kësaj rëndësie”, komentoi një burim pranë kampit norvegjez.
Kujtojmë se norvegjezët kanë vite që punojnë për të ndërtuar një skuadër të aftë t’i japë fund pritjes së gjatë dhe të sigurojë kualifikimin në një kompeticion madhor, ndërsa kjo përballje konsiderohet si vendimtare për brezin e tyre të artë.
Mbetet të shihet nëse Haaland dhe bashkëlojtarët e tij do të munden të kalojnë këtë pengesë të padukshme dhe të vijojnë rrugën drejt finales.
Takimi Norvegji – Angli është planifikuar të zhvillohet të shtunën, në orën 23:00.//
