Lamine Yamal po vazhdon të vendosë rekorde me fanellën e Spanjës, ndërsa tashmë është futur mes 10 golashënuesve më të rinj në historinë e Kupës së Botës.
Talenti i Barcelonës shënoi golin e parë në fitoren 4-0 të Spanjës kundër Arabisë Saudite në Atlanta, duke e zhbllokuar ndeshjen që në minutën e 11-të.
18-vjeçari u tregua më i shpejtë se të tjerët në zonë pas një krosimi të ulët nga Mikel Oyarzabal dhe e dërgoi topin në rrjetë nga pranë, duke i dhënë avantazhin e hershëm ekipit të Luis de la Fuentes.
Përtej peshës së tij në këtë takim, ky gol ka marrë edhe vlerë historike. Në moshën 18 vjeç e 343 ditë, Yamal është zyrtarisht golashënuesi i tetë më i ri në historinë e Kupës së Botës.
Ai ka kaluar në këtë renditje emra të mëdhenj të futbollit si Lionel Messi dhe Julian Green, ndërsa në krye të listës mbetet legjenda braziliane Pele.
Lista e 10 golashënuesve më të rinj në historinë e Kupës së Botës:
Pele – 17 vjeç e 239 ditë
Manuel Rosas – 18 vjeç e 93 ditë
Gavi – 18 vjeç e 110 ditë
Ibrahim Mbaye – 18 vjeç e 143 ditë
Michael Owen – 18 vjeç e 190 ditë
Nicolae Kovacs – 18 vjeç e 197 ditë
Dmitri Sychev – 18 vjeç e 231 ditë
Lamine Yamal – 18 vjeç e 343 ditë
Lionel Messi – 18 vjeç e 357 ditë
Julian Green – 19 vjeç e 25 ditë
Yamal e kishte nisur nga stoli ndeshjen e parë të Spanjës në Kupën e Botës ndaj Kepit të Gjelbër për shkak të një shqetësimi të lehtë në kofshë, por ndaj Arabisë Saudite u rikthye si titullar dhe e tregoi menjëherë peshën e tij në lojë.
Me këtë gol, ylli i ri i Barcelonës jo vetëm që ndihmoi Spanjën të merrte një fitore të rëndësishme, por edhe regjistroi një tjetër rekord në karrierën e tij të jashtëzakonshme, e cila po merr përmasa historike pavarësisht moshës së tij të re./
