Shorti i fazës së parë kualifikuese të Ligës së Konferencës ka përcaktuar kundërshtarët e klubeve kosovare, duke u rezervuar atyre përballje mjaft interesante që në startin e rrugëtimit evropian.
Si nënkampione e Kosovës, Malisheva do të vihet përballë Vllaznisë së Shkodrës, në një takim që pritet të jetë i balancuar dhe me rivalitet të fortë.
Ballkani, në anën tjetër, ka nxjerrë nga shorti skuadrën uellsiane Connah’s Quay Nomads, një ekip që ka përvojë në arenën evropiane.
Dy përfaqësueset kosovare ndeshjen e parë do ta luajnë jashtë fushe më 9 korrik, ndërsa takimet e kthimit janë caktuar për më 16 korrik, një javë më pas.
Ndërkohë, Dukagjini, që vjen si fitues i Kupës së Kosovës, do ta nisë fushatën evropiane nga raundi i dytë kualifikues dhe emrin e kundërshtarit do ta kuptojë në ditët e ardhshme.
Edhe ekipet e tjera të rajonit tashmë kanë mësuar rivalët e tyre.
Elbasani do të ndeshet me BATE Borisov nga Bjellorusia, ndërsa Shkëndija do të përballet me Europa FC të Gjibraltarit.
Sa i përket Deçiqit, ai do të ketë përballë skuadrën letoneze Liepaja.
