Ballkani ka zyrtarizuar afrimin e Lorik Dobratiqit, me sulmuesin 26-vjeçar që i jep fund qëndrimit te Prishtina e Re dhe zgjedh të vijojë karrierën te nënkampionët e Kosovës.
Klubi nga Theranda nuk ka paguar për transferimin e tij, pasi futbollisti ishte i lirë pas përfundimit të kontratës. Nga ana tjetër, Dobratiqi ka nënshkruar një marrëveshje 3-vjeçare me Ballkanin, e cila do të zgjasë deri në verën e vitit 2029.
Sa i përket karrierës së tij, 26-vjeçari hapat e parë i ka hedhur në Kosovë me KF Minatori. Më pas, ai ka qenë pjesë edhe e Bashkimit, Rahovecit, Shkëndijës dhe, së fundmi, e Prishtinës së Re.
