Para ndeshjes Shqipëri – Finlandë, Federata Shqiptare e Futbollit organizoi një ceremoni të veçantë për t’i dhënë lamtumirën Armando Sadikut nga Kombëtarja kuqezi.
Sulmuesi e përfaqësoi Shqipërinë nga viti 2012 deri në vitin 2023. Gjatë kësaj periudhe, ai luajti 39 ndeshje me fanellën kuqezi dhe shënoi 12 gola.
Sadiku do të kujtohet veçanërisht për golin kundër Rumanisë në Kampionatin Evropian të vitit 2016. Ai gol i siguroi Shqipërisë fitoren e saj të parë në fazën finale të këtij kompeticioni dhe mbetet një nga çastet më të veçanta të futbollit shqiptar.
Në shenjë mirënjohjeje për kontributin e tij ndër vite, tifozët kuqezi e duartrokitën Sadikun në stadiumin “Air Albania”, duke përshëndetur simbolikisht karrierën e tij me Kombëtaren.
