Miqësorja e parë e Kombëtares, zbuloni arbitrin që vendos drejtësi në Shqipëri – Lihtenshtejn

Shqipëria do të luajë mbrëmjen e së hënës testin e parë miqësor të muajit mars. Kuqezinjtë e Sylvinhos do të përballen me Lihtenshtejnin.

Sfida që do të zhvillohet në “Haladás Sportkomplexum”, Hungari, do të startojë në orën 20:00.

Tashmë është mësuar edhe arbitri që do të vendosë drejtësi në këtë ndeshje.

Bëhet fjalë për gjyqtarin, Bence Csonka. Arbitri hungarez do të jetë ai që do të gjykojë sfidën e Kombëtares shqiptare.

32-vjeçari gjithashtu do të ketë në krah asistentët Norbert Bornemissza dhe Peter Garai. Edhe dy asistentët janë me origjinë hungareze.

Përsa i përket kryesorit, Csonka është një arbitër i ri në moshë, pa shumë eksperiencë ndërkombëtare.

Ndeshjet e fundit ndërkombëtare që ai ka gjykuar kanë qenë Rijeka – Dinamo Zagreb dhe Puskas Akademie U17 – Juventus U17.