Gjatë një interviste në “Top Albania Radio”, moderatorja sportive Vjosana Nozllaku ka zbuluar detaje nga fillimi i lidhjes me futbollistin Ardit Krymi, me të cilin tashmë ka kurorëzuar dashurinë në martesë.
Ajo tregoi se e kishte pasur prej kohësh si shok në Instagram, por pa i bërë ndonjë përshtypje të veçantë. Sipas saj, ai reagonte herë pas here ndaj “storieve” që ajo ndante, por ajo nuk i kushtonte rëndësi.
Vjosana pranoi se e kishte nënvlerësuar dhe shpesh as që ia hapte mesazhet. Dashuria mes tyre lindi krejt papritur, pasi ajo nuk kishte pasur ndonjëherë dëshirë të kishte një partner futbollist, duke menduar se jeta e tyre rrotullohet vetëm rreth futbollit dhe se nuk do të kishte vëmendjen e plotë të tij.
Megjithatë, realiteti doli krejt ndryshe nga sa e kishte imagjinuar. Ajo theksoi se Arditi arrin t’i menaxhojë shumë mirë prioritetet, duke ditur saktësisht vendin e futbollit dhe karrierës, por edhe atë të saj dhe të familjes. E vetmja nuancë, siç e pranoi me humor, është se ai anon pak më shumë nga futbolli, por kjo nuk përbën shqetësim për të.
