Gjermania e siguroi kualifikimin në fazën me eliminim direkt të Kupës së Botës 2026 pas fitores 2-1 ndaj Bregut të Fildishtë në ndeshjen e saj të dytë në Grupin E, por përzgjedhësi Julian Nagelsmann nuk dëshiron që entuziazmi ta marrë hov.
Në takimin e luajtur në BMO Field në Toronto, Bregu i Fildishtë kaloi i pari në epërsi në minutën e 30-të falë golit të kapitenit Franck Kessie.
Gjithsesi, protagonisti i mbrëmjes ishte Deniz Undav, i cili hyri nga banka rezervë në minutën e 60-të dhe e ndryshoi rrjedhën e ndeshjes.
Sulmuesi i Stuttgartit barazoi në minutën e 68-të, ndërsa në minutën e katërt të shtesës shënoi golin e triumfit, duke i dhuruar Gjermanisë tri pikë shumë të rëndësishme dhe kalimin në raundin tjetër të turneut. Për Undav, ky ishte goli i nëntë në vetëm 11 paraqitje me fanellën e përfaqësueses gjermane.
Nagelsmann mbetet i përmbajtur pavarësisht suksesit
Pas ndeshjes, trajnerja-prezantuese Laura Wontorra e pyeti teknikun gjerman nëse kjo fitore ndaj një kundërshtari të fortë si Bregu i Fildishtë ishte shenjë se Gjermania ishte kthyer mes skuadrave të klasit botëror.
Megjithatë, Nagelsmann nuk iu bashkua euforisë që po ndërtohej rreth ekipit të tij. Ai kujtoi se vetëm pak javë më parë klima rreth kombëtares ishte krejt tjetër dhe se një fitore e vetme nuk duhet ta ndryshojë menjëherë mënyrën si shihet skuadra.
“Nuk kemi nevojë të flasim tani nëse jemi apo jo të klasit botëror. Vetëm tre javë më parë gjithçka ishte në rrëmujë”, u shpreh ai.
Përzgjedhësi i Gjermanisë nënvizoi se i vetmi fokus i ekipit është ndeshja e fundit në grup ndaj Ekuadorit, duke shtuar se skuadra duhet të vazhdojë të bëjë punën e saj pa u ndikuar nga debatet dhe vlerësimet që vijnë nga jashtë.
Gjermania do të luajë kundër Ekuadorit në xhiron e fundit të Grupit E, ndërsa Nagelsmann kërkon që skuadra të mbajë përqendrim maksimal përpara nisjes së fazës me eliminim direkt.
