Mbrojtësi i Portugalisë, Ruben Dias, vijon të mbetet në dyshim për ndeshjen e parë të ekipit të tij në Kupën e Botës 2026, pasi edhe në seancën më të fundit stërvitore është përgatitur i veçuar nga pjesa tjetër e skuadrës.
Qendërmbrojtësi vazhdoi programin individual të rikuperimit gjatë stërvitjes së Portugalisë në Miami, duke shtuar paqartësitë për gatishmërinë e tij në përballjen e fazës së grupeve ndaj Republikës Demokratike të Kongos, që luhet të mërkurën.
Dias mungoi edhe në stërvitjen e parë të Portugalisë në Shtetet e Bashkuara të Amerikës të shtunën, teksa zhvilloi ushtrime të veçanta larg grupit.
I njëjti skenar u përsërit edhe të hënën, kur ai vrapoi më vete në fushë përpara se të vijonte punën rikuperuese në palestër.
Seanca stërvitore u zhvillua pasi programi i së dielës ishte anuluar për shkak të kushteve të pafavorshme të motit.
Ndërkohë, pjesa tjetër e skuadrës së drejtuar nga Roberto Martinez u përgatit normalisht dhe pa asnjë kufizim.
Stafi mjekësor i Portugalisë do të vazhdojë të ndjekë nga afër gjendjen e mbrojtësit të Manchester Cityt në ditët në vijim, para se të merret vendimi përfundimtar për aktivizimin e tij në ndeshjen e parë të Botërorit.
29-vjeçari konsiderohet një nga lojtarët kyç në objektivat e Portugalisë për të shkuar sa më larg në turne, por prania e tij ndaj RD Kongos mbetet ende e pasigurt.
