Kupa e Botës ka treguar sërish se është në gjendje të nxjerrë yje të sportit global brenda një nate dhe t’ia ndryshojë rrënjësisht jetën dikujt.
Shembulli më i fundit, dhe ndoshta më i veçanti, është Vozinha, portieri me përvojë i përfaqësueses së Kepit të Gjelbër, i cili është kthyer në një sensacion të vërtetë në mbarë planetin.
Pas një paraqitjeje të jashtëzakonshme dhe pritjeve të shkëlqyera në përballjen ndaj Spanjës së fortë, profili i tij në rrjetet sociale përjetoi një shpërthim të jashtëzakonshëm.
Sipas faqes së njohur të futbollit Football Tweet, para nisjes së Kupës së Botës, Vozinha ishte pothuajse i panjohur për publikun e gjerë jashtë Afrikës dhe në Instagram ndiqej nga vetëm 50,000 persona.
Por efekti i Kupës së Botës u pa menjëherë. Pas ndeshjes së jetës kundër spanjollëve, numri i ndjekësve të tij u ngjit në një shifër të pabesueshme prej 14 milionësh.
“Ndikimi i Kupës së Botës është absolutisht i pabesueshëm. Vozinha kishte 50,000 ndjekës para turneut dhe tani pothuajse ka kaluar Manuel Neuerin, një nga portierët më të mëdhenj të të gjitha kohërave”, thuhej në postimin që mori dhenë nëpër botë.
Për ta kuptuar më qartë përmasën e këtij fenomeni, mjafton të shihen statistikat dhe krahasimi me emrat më të mëdhenj.
Portieri legjendar gjerman dhe ikona e Bayern Munichut, Manuel Neuer, aktualisht numëron 14.7 milionë ndjekës në Instagram.
Vozinha, me 14 milionë ndjekës, i është afruar edhe më shumë dhe, nëse kombëtarja e tij vazhdon me paraqitje të mira, tifozët e futbollit mund të shohin së shpejti një situatë ku portieri i Kepit të Gjelbër ka një bazë më të madhe ndjekësish se një prej portierëve më të mirë në histori.
