Sulmuesi kosovar Vedat Muriqi ka mbërritur në Stamboll për të përmbyllur rikthimin e tij te Fenerbahçe.
Klubi turk ka gjetur një marrëveshje parimore me futbollistin nga Kosova, ndërsa hapi i fundit përpara zyrtarizimit të transferimit mbetet kryerja e kontrolleve mjekësore dhe firmosja e kontratës.
Ky transferim shihet si lëvizja e parë e madhe e presidencës së re të Aziz Yıldırım, i cili është kthyer në drejtimin e klubit pas tetë vitesh.
Muriqi është një emër i njohur për tifozët e Fenerbahçes. Ai mbajti veshur fanellën e klubit në sezonin 2019/20, ku zhvilloi 36 ndeshje, shënoi 17 gola dhe dha shtatë asistime. Paraqitjet e tij shumë të mira në atë periudhë bënë që më pas të transferohej në futbollin evropian.
Sulmuesi është pritur në aeroportin e Stambollit nga anëtarë të bordit dhe nga një grup tifozësh.
32-vjeçari vjen pas një sezoni shumë të suksesshëm me RCD Mallorca. Pavarësisht rënies së skuadrës nga elita e futbollit spanjoll, Muriqi realizoi 23 gola gjatë sezonit, duke e mbyllur në vendin e dytë në garën për “Këpucën e Artë” të kampionatit, pas Kylian Mbappé.
Gjatë karrierës së tij, Muriqi ka luajtur edhe për klube si Giresunspor, Gençlerbirliği dhe Çaykur Rizespor, duke u shndërruar në një nga sulmuesit kosovarë më të suksesshëm në futbollin evropian.
