Thomas Tuchel po konfirmohet si një figurë me ndikim të madh në stolin e Kombëtares së Anglisë, teksa ka ndërtuar një nisje shumë të fortë në krye të “Tre Luanëve”.
Sipas të dhënave të publikuara nga “Squawka”, ai është vetëm trajneri i dytë i Anglisë në shekullin 21 që nuk njeh humbje në 12 ndeshjet e para zyrtare në drejtimin e kombëtares. Më herët, një ecuri e tillë ishte arritur edhe nga Roy Hodgson.
Nën udhëheqjen e Tuchel, Anglia ka shfaqur qëndrueshmëri dhe rregullsi në rezultate, ndërsa është paraqitur si një prej ekipeve më të mirëorganizuara në Kupën e Botës, duke shtuar besimin për fazën eliminatore të kompeticionit.
Debutimi i Tuchel me Anglinë erdhi përballë Shqipërisë, sfidë që u mbyll me fitoren 2-0. Në total, ai ka drejtuar ekipin në 18 ndeshje, gjashtë prej të cilave miqësore, duke regjistruar 14 fitore, dy barazime dhe dy humbje.
Dy disfatat e vetme të Anglisë me Tuchel si përzgjedhës kanë ardhur në takime miqësore, fillimisht 1-3 kundër Senegalit dhe më pas 0-1 ndaj Japonisë.
