Rruga e Senegalit në Kupën e Botës rrezikon të ndikohet ndjeshëm nga vështirësitë financiare, pasi lojtarët janë të pakënaqur për bonuset e pashlyera dhe për faktin që skuadra drejtohet nga një trajner pa kontratë.
Kombëtarja e Senegalit në Botëror mund të përballet me përçarje të brendshme për shkak të bonuseve të papaguara, paqartësive rreth trajnerit dhe problemeve me organizimin bazë, si ushqimi dhe kushtet në kamp, ndërsa përfaqësuesja afrikane synon të bëjë paraqitje të rëndësishme në turneun që po mbahet në Amerikën e Veriut.
Senegali shihet si një nga forcat më të mëdha të futbollit afrikan, bashkë me Marokun, i cili renditet i 7-ti në botë. Ata e mundën Marokun në finalen e Kupës së Kombeve të Afrikës vitin e kaluar, edhe pse ajo fitore u anulua më vonë pas një incidenti kur ekipi senegalez u largua nga fusha për afërsisht 10 minuta.
Po ashtu, Senegali arriti një fitore të rëndësishme 3-0 si mysafir ndaj Anglisë vitin e kaluar, duke dëshmuar potencialin e madh para fillimit të Botërorit në Amerikën e Veriut.
Ekipi e nisi fushatën në Botëror me humbje 3-1 ndaj Francës, një prej skuadrave favorite të turneut, por ende mbetet në garë për kalimin në fazën me eliminim direkt nëse fiton njërën nga dy ndeshjet e mbetura në grup.
Megjithatë, gjendja brenda kampit nuk paraqitet e qetë. Sipas raportimeve, përfaqësuesja e Senegalit po kalon tensione të forta për shkak të çështjeve financiare, që nga bonuset e pashlyera deri te fakti që trajneri i ekipit nuk ka një kontratë zyrtare.
Sipas Sports News Africa, Federata e Futbollit të Senegalit duket se po përpiqet t’i zbusë në heshtje shqetësimet lidhur me bonuset e lojtarëve, të cilat ende nuk janë shlyer pavarësisht premtimeve të bëra ndaj futbollistëve të kombëtares.
Po ashtu, raportohet se federata ka përfituar prej muajsh pagesa të konsiderueshme nga AFCON 2025, si edhe bonuse që lidhen me kualifikimin në këtë Botëror.
Në të njëjtën kohë, hoteli i zgjedhur si bazë e ekipit në Shtetet e Bashkuara thuhet se nuk përmbush standardet e nevojshme për një turne të këtij niveli, duke shtuar më tej pakënaqësinë brenda skuadrës.
