Jorge Salinas është shndërruar në një nga emrat më të komentuar të merkatos dhe zhvillimet më të fundit e lidhin ngushtë me një kalim te Barcelona për edicionin 2026/27.
Mbrojtësi i talentuar i Racing Santander, vetëm 19 vjeç, ka bërë përparim të dukshëm gjatë këtij sezoni dhe tashmë është në radarët e disa prej klubeve më të mëdha në Spanjë, Premier League dhe kampionateve të tjera evropiane.
Sipas mediave spanjolle, Barcelona ka ndërmarrë hapa konkretë për ta përfunduar marrëveshjen para 30 qershorit, një datë që konsiderohet vendimtare për të ardhmen e futbollistit.
Shkaku është i thjeshtë: klauzola aktuale e lirimit të Salinas është 8 milionë euro, por duke nisur nga 1 korriku, ajo do të dyfishohet në 16 milionë euro, duke e bërë operacionin shumë më të kushtueshëm.
Drejtori sportiv i Barcelonës, Deco, e sheh Salinasin si një profil mjaft tërheqës për shkak të moshës së tij të re, potencialit të lartë për rritje dhe kostos që ende konsiderohet e arsyeshme në tregun e sotëm.
Ndonëse gjatë këtij sezoni ka spikatur kryesisht si mbrojtës i majtë, lojtari është formuar fillimisht si qendërmbrojtës i majtë, një cilësi që vlerësohet shumë nga drejtuesit e klubit katalanas.
Edicioni i tij me Racing Santander ka qenë shumë i suksesshëm. Salinas ka luajtur 33 ndeshje në kampionat, ka dhënë shtatë asistime dhe ka qenë një nga elementët kryesorë në rikthimin e skuadrës në La Liga pas 14 vitesh mungesë nga niveli më i lartë i futbollit spanjoll.
Performancat e tij nuk kanë mbetur pa tërhequr vëmendje. Përveç Barcelonës, disa klube nga Spanja dhe ekipe angleze po e ndjekin nga afër zhvillimin e tij.//
