Ekuadori u ndal në një barazim 0-0 ndaj Curaçaos, në një ndeshje ku pati kontrollin për pjesën më të madhe të kohës, por u përball me një portier të shkëlqyer dhe me mungesë saktësie në finalizim.
Që në fillim të takimit, ekuadorianët e bënë të qartë prirjen e tyre sulmuese. Në minutën e tretë, Enner Valencia pati një mundësi të mirë shënimi, por portieri Eloy Room ndërhyri në mënyrë të shkëlqyer dhe evitoi golin e epërsisë.
Pjesa e parë ishte e fortë dhe e luftuar, me shumë duele në mesfushë dhe disa ndërhyrje të ashpra që sollën kartonë të verdhë për Jordy Alcivar te Ekuadori dhe Leandro Bacuna te Curaçao. Rasti më i mirë para pushimit u regjistrua në minutën e 42-të, kur John Yeboah goditi rrezikshëm nga brenda zonës, por edhe këtë herë Room u tregua i pakalueshëm.
Në minutën e 59-të, Gonzalo Plata shpërdoroi një rast shumë të mirë për Ekuadorin, pasi nuk arriti të mposhtte portierin kundërshtar me një goditje me kokë nga afër.
Vetëm një minutë më pas, Curaçao iu afrua golit me Livano Comenencia, por Hernan Galindez bëri një pritje të shkëlqyer për ta mbajtur portën të paprekur.
Presioni i Ekuadorit u rrit në minutat që pasuan. Enner Valencia iu afrua shumë golit në minutën e 65-të, por Eloy Room realizoi edhe një tjetër pritje spektakolare pas goditjes së sulmuesit ekuadorian. Një minutë më vonë provoi edhe Willian Pacho me kokë pas një goditjeje nga këndi, por portieri i Curaçaos mbeti sërish i vëmendshëm.
Të dy trajnerët bënë disa zëvendësime në pjesën e mbetur të ndeshjes, ndërsa Curaçao u përqendrua kryesisht te ruajtja e barazimit. Jurien Gaari u ndëshkua me karton të verdhë në minutën e 75-të, ndërsa Dick Advocaat e rifreskoi skuadrën me disa lëvizje për t’i bërë ballë presionit të vazhdueshëm të Ekuadorit.
Pavarësisht insistimit dhe rasteve të krijuara, Ekuadori nuk mundi të gjente golin, ndërsa Curaçao rezistoi deri në fund për të marrë një pikë të vlefshme.
Njeriu i ndeshjes ishte pa diskutim portieri Eloy Room, i cili me disa pritje vendimtare e mbajti të paprekur portën e ekipit të tij dhe u shndërrua në figurën kryesore të sfidës.
