Kombëtarja e Holandës e mundi në mënyrë bindëse Suedinë me rezultat 5-1 në ndeshjen e saj të dytë në Grupin F, të zhvilluar në Houston.
Brian Brobbey (5′, 17′) dhe Cody Gakpo (47′, 54′) realizuan nga dy gola secili për Holandën, ndërsa Anthony Elanga (59′) shënoi golin e vetëm për Suedinë, përpara se Crysencio Summerville (89′) të vuloste rezultatin përfundimtar.
Trajneri i Holandës, Ronald Koeman, dëshmoi se ka instinkt të shkëlqyer, duke e aktivizuar nga minuta e parë sulmuesin e fuqishëm Brobbey, i cili nuk kishte luajtur në ndeshjen e parë ndaj Japonisë. Ai ia shpërbleu menjëherë besimin me dy gola të hershëm, të dy të realizuar nga afër pas krosimeve të ulëta nga krahët nga Gakpo dhe Dumfries.
Dy rekorde për Holandën
Holanda vendosi sonte dy rekorde në Kupën e Botës. Kjo ishte ndeshja e 14-të radhazi pa humbje për ta, një seri që nisi në raundin e parë të Kupës së Botës 2014 me fitoren 5-1 ndaj Spanjës.
Që prej atëherë, “Portokallinjtë” kanë regjistruar 10 fitore dhe katër barazime, përfshirë dy barazime ndaj Argjentinës në gjysmëfinalen e vitit 2014 dhe çerekfinalen e vitit 2022. Në të dy rastet, ata u eliminuan pas penalltive.
Hera e fundit kur Holanda humbi në Kupën e Botës, pa llogaritur gjuajtjet e penalltive që regjistrohen si barazime, ishte finalja e vitit 2010, kur Spanja triumfoi 1-0 pas vazhdimeve.
Rekordi mbahej më parë nga Brazili i Pele-s, që arriti 13 ndeshje radhazi pa humbje mes viteve 1958 dhe 1966. Gjatë asaj serie, brazilianët fituan 11 ndeshje dhe barazuan dy.
Kjo ishte gjithashtu ndeshja e 18-të radhazi për Holandën pa humbje në fazën e grupeve. Kjo seri kishte nisur në raundin e tretë të Kupës së Botës 1994 me një fitore 2-1 ndaj Marokut. Humbja e tyre e fundit në atë fazë kishte ardhur kundër Belgjikës (1-0).
Me këtë fitore, Holanda ngjitet në krye të renditjes me katër pikë, ndërsa Suedia mban vendin e dytë me tre pikë.
