Manchester United ka shfaqur interes për transferimin e Marc Casados, me synimin për të përforcuar mesfushën përpara nisjes së sezonit të ri, sipas mediave spanjolle.
Drejtuesit e klubit nga “Old Trafford” e kanë vendosur si prioritet kryesor shtimin e alternativave cilësore në repartin qendror, në prag të një sezoni që pritet të jetë shumë kërkues.
Pas arritjes së kualifikimit në edicionin e ardhshëm të Ligës së Kampionëve, kërkesat e stafit teknik janë rritur ndjeshëm.
Trajneri Michael Carrick synon të formojë një skuadër konkurruese, të aftë për ta përballuar me sukses rikthimin në nivelin më të lartë të futbollit evropian.
“Djajtë e Kuq” tashmë e kanë finalizuar transferimin e mesfushorit Ederson nga Atalanta për një shumë të konsiderueshme, por drejtuesit vazhdojnë kërkimet për një profil plotësues që mund të ofrojë ekuilibër taktik dhe intensitet në fazën mbrojtëse.
Në këtë kuadër, Manchester United po e ndjek nga afër situatën e Marc Casados, i cili shihet si një nga emrat më tërheqës të merkatos së verës.
Mesfushori 22-vjeçar vlerësohet shumë nga stafi teknik anglez për aftësinë e tij në rikuperimin e topit, një cilësi që e bën një profil të përshtatshëm për mesfushën e ekipit.
Edhe pse pati një periudhë të mirë nën drejtimin e trajnerit gjerman Hansi Flick, roli i Casados në skuadër është zvogëluar gradualisht. Dalja në pah e talenteve të tjerë nga akademia, si Marc Bernal, ka ndikuar që ai të mos ketë më statusin e padiskutueshëm në formacion.
Sezonin e kaluar, Casado ishte titullar në vetëm 10 ndeshje të La Ligës, ndërsa në total regjistroi 34 paraqitje në të gjitha garat me skuadrën katalanase.
