Kupa e Botës 2026 ka dhuruar spektakël që nga ndeshjet e para të fazës së grupeve. Në 24 takimet e luajtura deri më tani janë shënuar plot 75 gola, me një mesatare prej 3.125 golash për ndeshje, shifra më e lartë në këtë fazë të turneut që nga viti 1958.
Pavarësisht dyshimeve rreth formatit të zgjeruar të Botërorit, konkurrenca dhe ekuilibri mes ekipeve nuk kanë munguar.
Nëntë nga 24 ndeshjet kanë përfunduar në barazim, duke e çuar përqindjen e barazimeve në 37.5 për qind, niveli më i lartë në këtë fazë që nga viti 2010.
Pas mbylljes së raundit të parë të ndeshjeve, statistikat individuale kanë nxjerrë në pah disa futbollistë që kanë spikatur më shumë se të tjerët.
Gjuajtësit më aktivë
Gjashtë lojtarë regjistruan gjashtë ose më shumë goditje në ndeshjen e tyre të parë, por vetëm dy prej tyre arritën të shënonin – Harry Kane i Anglisë dhe Lionel Messi i Argjentinës.
Dy golat e Kane e vendosën atë në të njëjtin nivel me Gary Lineker si golashënuesi më i mirë i Anglisë në historinë e Kupës së Botës me 10 gola, ndërsa tregolëshi i Messit e çoi ikonën argjentinase në kuotën e 16 golave, duke barazuar rekordin e Miroslav Klose si golashënuesi më i mirë në historinë e turneut.
Mesfushori turk Arda Guler kryeson për numrin e gjuajtjeve me tetë tentativa, por këto raste prodhuan vetëm 0.26 gola të pritshëm, çka tregon se shumica e goditjeve të tij erdhën nga pozicione të vështira.
Nga ana tjetër, Son Heung-min i Koresë së Jugut ishte mes lojtarëve më të pafat para portës. Ai nuk arriti të shënonte edhe pse krijoi raste me vlerë totale 1.0 nga gjashtë tentativa.
Ndërkohë, 24 futbollistë kanë një normë perfekte realizimi prej 100 për qind, por vetëm dy prej tyre kanë shënuar më shumë se një gol: Yasin Ayari i Suedisë dhe Elijah Just i Zelandës së Re, që kanë realizuar nga dy gola secili.
Krijuesit më të mirë të rasteve
Shtatë lojtarë krijuan nga pesë raste ose më shumë në ndeshjen e tyre hapëse, por vetëm Joshua Kimmich i Gjermanisë arriti të regjistronte dy asistime, në fitoren e thellë 7-1 ndaj Curaçaos.
Pedri ishte futbollisti më kreativ i raundit të parë sipas statistikës së asistimeve të pritshme, me 1.23.
Mesfushori spanjoll bëri gjithçka për të ndihmuar skuadrën e tij kundër Kepit të Gjelbër dhe gjithashtu rikuperoi topin gjashtë herë në të tretën sulmuese të fushës, dy herë më shumë se çdo lojtar tjetër në turne.
‘Mbreti’ i driblimeve
Amad Diallo i Bregut të Fildishtë ka qenë dribluesi më efektiv i Botërorit deri në këtë pikë.
Edhe pse luajti vetëm 34 minuta si zëvendësues, sulmuesi i Manchester United regjistroi numrin më të lartë të driblimeve të suksesshme dhe përqindjen më të lartë të suksesit mes lojtarëve që tentuan të paktën pesë driblime.
Në krahun tjetër, Vinicius Junior shënoi golin e Brazilit kundër Marokut, por nuk arriti të kalonte asnjë kundërshtar në nëntë tentativat e tij për driblim, statistika më e dobët e këtij lloji në turne deri tani.
Fituesit e dueleve
Kur flitet për duelet individuale, Jiovany Ramos i Panamasë dhe Krepin Diatta i Senegalit kanë qenë më dominuesit në raundin e parë.
Mes 158 lojtarëve që u përfshinë në të paktën 10 duele, këta dy futbollistë regjistruan përqindjen më të lartë të fitoreve.
Një përmendje të veçantë meriton edhe Jovo Lukic i Bosnje-Hercegovinës, i cili ishte i pakalueshëm në ajër ndaj Kanadasë.
Sulmuesi fitoi të nëntë duelet ajrore që zhvilloi, duke qenë i vetmi lojtar në turne me më shumë se katër duele ajrore që ka ruajtur një rekord perfekt.
