Liverpooli është përfshirë papritmas në garën për të transferuar anësorin e Osasunës, Victor Munoz, i cili raportohej se ishte shumë pranë kalimit te Newcastle United, por klubi nga Anfield ka arritur t’ia marrë këtë marrëveshje në një kohë shumë të shkurtër.
Specialisti i merkatos, Fabrizio Romano, ka bërë të ditur se kalimi i Munoz nga Osasuna te Liverpooli gjatë kësaj vere tashmë konsiderohet i mbyllur.
“EKSKLUZIVE: Liverpooli është pranë firmosjes me Victor Munoz. Ja ku jemi! Gjithçka është gati për nënshkrimin dhe kemi edhe një tjetër surprizë të madhe”, ka shkruar fillimisht Romano.
Romano bëri të ditur gjithashtu se Newcastle kishte zhvilluar bisedime të avancuara me Osasunën për talentin e ri spanjoll për një periudhë të caktuar, përpara se Liverpooli të hynte në skenë.
“Pas marrëveshjes surprizë me Liverpoolin: 40 milionë euro për Victor Munoz, klauzola e largimit është aktivizuar, ndërsa vizitat mjekësore janë përfunduar tashmë në SHBA”.
“Njoftimi zyrtar pritet të bëhet këtë javë. Një surprizë e madhe pas rrëmbimit të lojtarit, me Real Madridin që përfitoi 20 milionë euro”, shtoi Romano.
Nga ana tjetër, sipas gazetarit Ben Jacobs, Munoz do të firmosë një kontratë gjashtëvjeçare me Liverpoolin.
Ndërkohë, 22-vjeçari spanjoll mund të aktivizohet në repartin ofensiv dhe vlerësohet si një rrezik i madh në tranzicion, diçka që do t’i shërbente planeve të Andoni Iraolës për rikthimin e futbollit me intensitet të lartë.
Sezonin e kaluar, Munoz realizoi gjashtë gola në La Liga me Osasunën, ndërsa regjistroi edhe dy asistime.
