Lionel Messi po vazhdon të marrë elozhe nga emrat më të mëdhenj të futbollit botëror pas paraqitjes së tij historike kundër Algjerisë në Kupën e Botës 2026, ku shënoi het-trik dhe u ngjit në vendin e parë si golashënuesi më i mirë i të gjitha kohërave në historinë e turneut.
Kësaj radhe, vlerësimi erdhi nga legjenda braziliane Ronaldo Nazario, i cili la mënjanë rivalitetin e njohur mes Brazilit dhe Argjentinës për të përshëndetur arritjen e kapitenit argjentinas.
Messi hyri në histori në fitoren 3-0 të Argjentinës ndaj Algjerisë, duke shkuar në 16 gola në Kupat e Botës dhe duke lënë pas disa prej emrave më të mëdhenj që kanë luajtur ndonjëherë në këtë garë.
Ronaldo, që e njeh më mirë se shumica presionin dhe madhështinë e skenës së Kupës së Botës, pranoi se nuk ishte aspak i habitur që ishte pikërisht Messi ai që e theu rekordin.
“Rekordet janë bërë për t’u thyer dhe personi që e theu këtë rekord nuk habit askënd në botën e futbollit. Për më tepër, Argjentina është kampionia në fuqi e këtij kompeticioni”.
“Sa herë që Messi futet në fushë, gjithçka tjetër bëhet histori dhe elegancë”.
“Ka ardhur momenti që bota të ndalojë së fshehuri dhe të pranojë faktin se ai është lojtari më i madh i të gjitha kohërave. Ai vazhdon të shkëlqejë çdo sezon dhe në Kupën e Botës, por ende ka njerëz që dyshojnë tek ai”.
“Ishte një mbrëmje e paharrueshme dhe historike që do të mbetet përgjithmonë në faqet e historisë”, shtoi Ronaldo.
Deklarata e brazilianit pritet të rihapë edhe një herë debatin e përhershëm për lojtarin më të madh të të gjitha kohërave, sidomos duke pasur parasysh se vjen nga një prej figurave më të respektuara në historinë e futbollit.
Messi, i cili tashmë ka fituar gjithçka me Argjentinën, përfshirë Kupën e Botës dhe dy trofe të Copa America, vazhdon të shtojë kapituj të rinj në karrierën e tij legjendare edhe pranë 39-vjetorit.
