Barcelona ka marrë një goditje në përpjekjet për ta transferuar Bradley Barcolan gjatë afatit kalimtar të verës.
Edhe pse klubi katalanas kishte ofruar rreth 50 milionë euro për kartonin e lojtarit, bashkë me një pagë vjetore prej 13 milionë eurosh, as Paris Saint-Germaini dhe as vetë futbollisti nuk kanë treguar interes për finalizimin e kësaj marrëveshjeje.
Sulmuesi i krahut, 23-vjeçari francez, ka zhvilluar një sezon shumë të mirë me PSG-në, duke realizuar 13 gola dhe shtatë asistime, gjë që e ka forcuar statusin e tij si një nga talentet më premtues në futbollin evropian.
Megjithatë, projekti sportiv i kampionëve aktualë të Evropës është parë si më bindës sesa përfitimet financiare që ka ofruar Barcelona.
PSG ka refuzuar të futet në negociata për një shifër nën 75 milionë euro, një qëndrim që e ka vështirësuar ndjeshëm çdo mundësi transferimi. Drejtuesit e klubit parisien vlerësojnë se Barcola ka një çmim dukshëm më të lartë se oferta e Barcelonës dhe e shohin atë si një pjesë kyçe për ruajtjen e konkurrueshmërisë së skuadrës në të gjitha garat.
Klubi francez e konsideron Barcolan një element të rëndësishëm të planeve të trajnerit Luis Enrique, sidomos pas ndihmës së tij në triumfin e fundit në Ligën e Kampionëve.
Me një kontratë që zgjat deri në vitin 2028, PSG e sheh francezin si një investim afatgjatë dhe nuk planifikon të heqë dorë nga një lojtar me potencial të madh botëror për më pak se 75 milionë euro.
Rrethanat janë bërë edhe më të ndërlikuara për Barcelonën për shkak të dëshirës së vetë lojtarit për të qëndruar në Paris. Barcola ndihet i vlerësuar te PSG dhe beson se do të vazhdojë të ketë një rol të rëndësishëm te njëra prej skuadrave më të forta në futbollin evropian.
Si rrjedhojë, Barcelona pritet të shqyrtojë mundësi të tjera në afatin kalimtar për të përforcuar repartin ofensiv për sezonin e ardhshëm.
